Presidenti i Francës, Emmanuel Macron, të martën, më 20 janar, ka denoncuar konkurrencën amerikane që synon të “nënshtrijë Evropën”, si dhe tarifat që i cilësoi si “të papranueshme”, pas kërcënimeve të presidentit amerikan Donald Trump për vendosjen e taksave ndaj vendeve që kundërshtojnë planet e tij për Grenlandën.
“Franca dhe Evropa janë të përkushtuara ndaj sovranitetit dhe pavarësisë kombëtare, ndaj Kombeve të Bashkuara dhe Kartës së saj”, tha Macron në Forumin Ekonomik Botëror në Davos, në kohën kur homologu i tij amerikan synon të marrë territorin autonom danez dhe ka ftuar vende të ndryshme në një ‘Bord global të Paqes’.
“Do të bëjmë çmos për të pasur një Evropë më të fortë, shumë më të fortë dhe më autonome”, tha Macron. “Këtu, në epiqendrën e këtij kontinenti, ne besojmë se na duhet më shumë rritje dhe më shumë stabilitet në këtë botë”, shtoi ai.
“Ne preferojmë respektin në vend të bullizimit”
“Por ne preferojmë respektin në vend të bullizimit”, tha presidenti francez. “Dhe preferojmë sundimin e ligjit në vend të brutalitetit.” Ai paralajmëroi për “një zhvendosje drejt një bote pa rregulla”, pa “qeverisje kolektive efektive”, që çon në “konkurrencë të pamëshirshme”.
Macron përshkroi “konkurrencën nga Shtetet e Bashkuara të Amerikës përmes marrëveshjeve tregtare që minojnë interesat tona të eksportit, kërkojnë lëshime maksimale dhe synojnë hapur dobësimin dhe nënshtrimin e Evropës”. Kjo, sipas tij, është e “kombinuar me një grumbullim të pafund tarifash të reja që janë thelbësisht të papranueshme – aq më tepër kur përdoren si mjet presioni ndaj sovranitetit territorial”.
Macron tha se nuk është planifikuar asnjë samit i G7-ës këtë javë, pasi Trump kishte zbuluar një mesazh që propozonte një takim për Ukrainën dhe Grenlandën. “Asnjë takim nuk është planifikuar. Presidenca franceze është e gatshme ta organizojë një të tillë”, i tha Macron Agjencisë Franceze të Lajmeve pas fjalimit.
Javën e kaluar, Macron ishte shfaqur në publik me një sy të skuqur gjatë një fjalimi për Vitin e Ri drejtuar ushtrisë, duke i kërkuar audiencës “ta falë pamjen jo të hijshme të syrit”./ Burimi: Le Monde
