Të paktën 31 persona kanë humbur jetën, ndërsa 169 të tjerë janë plagosur nga një sulm vetëvrasës gjatë faljes së namazit të së premtes në një xhami shiite në zonën Tarlai të Islamabadit, kryeqyteti i Pakistanit, kanë bërë të ditur autoritetet lokale.
Policia ka konfirmuar se sulmi është kryer nga një sulmues vetëvrasës, i cili ka detonuar një mjet shpërthyes pranë hyrjes së xhamisë. Dëshmitarët okularë raportojnë se para shpërthimit janë dëgjuar të shtëna me armë zjarri.
Pas sulmit, autoritetet kanë shpallur gjendje emergjente, ndërsa spitalet kanë bërë thirrje urgjente për dhurim gjaku për të ndihmuar të plagosurit. Pamjet nga vendi i ngjarjes tregojnë këpucë të shpërndara, xhama të thyer dhe besimtarë mes rrënojave, ndërsa viktimat janë transportuar me ambulanca dhe automjete private në spitale.
Kryeministri i Pakistanit, Shehbaz Sharif, ka dënuar sulmin, duke shprehur “dhimbje të thellë” dhe ka kërkuar një hetim të plotë për identifikimin e përgjegjësve. Edhe presidenti Asif Ali Zardari ka reaguar, duke e quajtur këtë sulm ndaj civilëve të pafajshëm “krim kundër njerëzimit”.
Sulmet në Islamabad janë relativisht të rralla, por ky incident vjen pas një jave të përgjakshme dhune në Pakistan, ku 58 civilë u vranë në sulme të koordinuara në provincën Balochistan. Sipas të dhënave zyrtare dhe raporteve të pavarura, viti i kaluar ka qenë më vdekjeprurësi në më shumë se një dekadë për shkak të rritjes së dhunës militante në vend
