Rikthimi në Champions League dhe ndërtimi i sezonit të ri: këto janë dy sfidat madhore që presin Milanin në muajt e ardhshëm. Pas diferencës në 10 pikë larg Inter, në shtëpinë kuqezi ka nisur koha e analizave dhe vendimeve të rëndësishme për të ardhmen.
Në qendër të vëmendjes është reparti ofensiv dhe sidomos situata e Niclas Fullkrug. I ardhur në janar nga West Ham United F.C. për të shtuar peshë dhe eksperiencë në sulm, gjermani ka bindur për profesionalizmin, shpirtin e sakrificës dhe gatishmërinë për ekipin. Edhe kur nuk ka qenë në formën më të mirë fizike, ai ka shtrënguar dhëmbët për të qenë i disponueshëm – një aspekt që është vlerësuar nga trajneri Massimiliano Allegri.
Megjithatë, përtej përkushtimit, drejtuesit po bëjnë llogaritë. Milani ka në dorë të drejtën e blerjes për 5 milionë euro, por pyetja është: a ia vlen investimi dhe a duhet të zërë një vend në projektin afatgjatë? Deri tani, Fullkrug nuk është parë si titullar i padiskutueshëm, por më shumë si armë shtesë nga stoli. E vetmja ndeshje si titullar erdhi kundër ACF Fiorentina, ku qëndroi vetëm 60 minuta përpara se të dilte për shkak dëmtimi.
Ndërkohë, në sfond po lëviz merkatoja. Drejtori sportiv Igli Tare po monitoron profile të rëndësishme për sulmin, me emra si Moise Kean dhe Dušan Vlahović, ky i fundit në skadencë kontrate në qershor. Por gjithçka lidhet ngushtë me objektivin madhor: kualifikimin në Champions. Pa atë, bëhet shumë më e vështirë të realizosh një merkato ambicioze.
Kujdes edhe nga largimet e mundshme: Christopher Nkunku mbetet në balancë, ndërsa për Rafael Leão mund të hapet dera në rast të një oferte të parezistueshme
Në “San Siro” pritet një verë e nxehtë: mes objektivave sportive dhe vendimeve strategjike, Milani po luan një nga ndeshjet më të rëndësishme – atë për të ardhmen.
