Tri anije mallrash janë sulmuar në Ngushticën e Hormuzit nga Irani, disa orë pasi presidenti i SHBA-së, Donald Trump, zgjati njëanshëm armëpushimin me Iranin, ndërsa bisedimet e paqes mbeten në dyshim.
Sipas mediave iraniane, Trupat e Gardës Revolucionare Islamike (IRGC) shënjestruan tri anije në Ngushticën e Hormuzit. Agjencia e lajmeve Fars, e lidhur me IRGC-në, raportoi se një anije e quajtur “Euphoria” u godit dhe aktualisht është e bllokuar pranë brigjeve të Iranit. Po ashtu, thuhet se anijet “MSC Francesca” dhe “Epaminondas” u bllokuan teksa përpiqeshin të kalonin ngushticën.
Trump deklaroi mbrëmë se po zgjaste armëpushimin, ndërkohë që do të vazhdonte edhe bllokadën amerikane në Ngushticën e Hormuzit, një masë e projektuar për të ushtruar presion ndaj Iranit përpara bisedimeve me SHBA-në në Pakistan.
Megjithatë, statusi i këtyre bisedimeve mbetet i paqartë. Zëvendëspresidenti JD Vance nuk është nisur ende për në Pakistan, siç pritej, ndërsa Irani nuk i është përgjigjur zyrtarisht as zgjatjes së armëpushimit dhe as pjesëmarrjes në bisedime.
Një këshilltar i kryetarit të parlamentit të Iranit deklaroi se zgjatja e armëpushimit “nuk do të thotë asgjë”, duke e cilësuar atë si “një dredhi për të fituar kohë për një sulm të papritur”.
Edhe pse Trump zgjati njëanshëm armëpushimin, ai theksoi se bllokada ndaj porteve detare iraniane do të vazhdojë, një veprim që Irani e konsideron si akt lufte.
Deri në orët e para të së mërkurës nuk ka pasur reagim zyrtar nga zyrtarë të lartë iranianë, megjithëse disa sinjale fillestare nga Teherani tregojnë se deklaratat e Trump po priten me skepticizëm.
Më herët, agjencia e lajmeve Tasnim, e lidhur me IRGC-në, raportoi se Irani nuk kishte kërkuar zgjatje të armëpushimit dhe kishte përsëritur kërcënimet për ta thyer bllokadën amerikane me forcë
