Barcelona është në kërkim të një sulmuesi “numër 9” këtë verë, pasi synon të zëvendësojë Robert Lewandowskin.
Edhe pse nuk ka dyshime se Julián Álvarezi është zgjedhja e parë për këtë rol, ka dyshime të mëdha për aftësinë e klubit për ta realizuar këtë transferim.
Për këtë arsye, janë përmendur disa alternativa më të lira.
Mes tyre janë ylli kosovar Vedat Muriqi, Alexander Sørloth i Atlético Madridit dhe João Pedro i Chelseat.
Një pjesë e problemit për Barcelonën është se ende nuk e di saktësisht buxhetin që do të ketë në dispozicion, mes zërave se ofertat për lojtarët kryesorë mund të merren në konsideratë, me pak përjashtime.
Fillimisht e raportuar nga “DM” këtë javë, “Sky Sports” ka konfirmuar tashmë se Barcelona është e interesuar për sulmuesin 19-vjeçar të Bournemouthit, Junior Kroupin.
Francezi po kalon një sezon shumë të mirë në Premierligë dhe ka tërhequr vëmendjen edhe të Manchester Cityt.
Sipas raportimeve, Barcelona e ka ndjekur nga afër Kroupin, por “Cherries” nuk kanë ndërmend ta shesin këtë verë.
Pavarësisht se ka nisur vetëm 20 ndeshje si titullar këtë sezon, sulmuesi i ri ka shënuar 12 gola në 32 paraqitje, që përkthehet në një gol çdo 134 minuta në sezonin e tij të parë në Angli.
Kroupi u transferua nga Lorient për 13 milionë euro 18 muaj më parë, por sezonin e kaluar e përfundoi pikërisht te ky klub.
Në Ligue 2, ai shënoi 23 gola dhe dhuroi 3 asistime në 32 ndeshje.
Ai ka fituar tashmë pesë paraqitje me Francën U21, ku ka realizuar edhe tre gola.
Një sulmues i gjithanshëm që ka luajtur edhe në krahun e majtë, ai kryesisht ka operuar si “numër 9” gjatë karrierës dhe njihet si një përfundues i fortë.
Me shumë gjasë, Barcelona e sheh Junior Kroupin si një projekt për të ardhmen ose një opsion afatgjatë, pasi do të ishte një kërkesë shumë e madhe që ai të vinte menjëherë dhe t’i besohej përgjegjësia për ambiciet e klubit në Ligën e Kampionëve.
