Irani ka ekzekutuar një inxhinier të ri të hapësirës ajrore, Erfan Shakourzadeh 29-vjeçar, nën akuza për spiunazh për CIA dhe Mossad, pavarësisht pretendimeve të tij se rrëfimi ishte marrë nën torturë, shkruan Euronews.
Sipas raportimeve, ai ishte një talent i shquar në inxhinierinë e hapësirës dhe kishte punuar në një institucion shkencor për satelitë në Iran. Ai u arrestua nga inteligjenca e Gardës Revolucionare Islamike në shkurt 2025.
Agjencia Mizan, e lidhur me gjyqësorin iranian, e përshkroi Shakourzadeh si “një spiun të përbashkët të CIA-s dhe Mossad-it”, duke thënë se ai ishte rekrutuar “si projekt dhe për shkak të ekspertizës së tij”.
Në një letër të nxjerrë nga burgu, ai ka mohuar akuzat dhe ka thënë se rrëfimi i tij është marrë nën torturë gjatë izolimit të gjatë. Pak para ekzekutimit, ai u transferua në burgun “Qezel Hesar”.
Rasti i tij ka ngjallur reagime të organizatave për të drejtat e njeriut, të cilat thonë se në Iran po rritet numri i ekzekutimeve të lidhura me akuza politike dhe të sigurisë, shpesh pa prova të qarta.
