Sekretari amerikan i Shtetit, Marco Rubio, ka deklaruar se ekzistojnë “disa shenja të mira” se një marrëveshje për përfundimin e luftës me Iranin mund të jetë afër, por ka theksuar se nuk dëshiron të jetë “tepër optimist”.
Rubio tha se bisedimet po vazhdojnë, ndërsa përfaqësues pakistanezë janë nisur drejt Iranit, por shtoi se SHBA po përballet me “një sistem të fragmentuar”.
Ai paralajmëroi se çdo marrëveshje do të ishte e pamundur nëse Irani vendos tarifa në Ngushticën e Hormuzit, duke e quajtur këtë veprim “të papranueshëm dhe të paligjshëm”.
Ngushtica e Hormuzit, përmes së cilës kalon rreth një e pesta e naftës botërore, është bërë vatër tensionesh mes SHBA-së dhe Iranit, duke ndikuar në rritjen e çmimeve të energjisë globalisht.
Ndërkohë, armëpushimi i brishtë mes dy vendeve qëndron në fuqi që nga prilli, por të dyja palët kanë paralajmëruar rifillimin e sulmeve.
Presidenti amerikan Donald Trump ka deklaruar se SHBA do të ndërmarrë “veprime drastike” nëse Irani nuk garanton se nuk do të zhvillojë armë bërthamore, ndërsa Teherani ka kërcënuar me zgjerim të konfliktit nëse sulmohet sërish. / Burimi: Sky News
