Trajneri i Barcelonës, Hansi Flick, e ka këshilluar Pep Guardiolën që të marrë pak kohë pushim nga futbolli pas largimit të tij nga Manchester City, i cili u konfirmua zyrtarisht të premten.
Ikona e Barcelonës do të largohet nga Etihad Stadium pas një dekade në Premierligë, ku fitoi gjashtë tituj kampioni dhe Ligën e Kampionëve.
Pas rrjedhjes së lajmit të hënën mbrëma, Manchester City e bëri zyrtar njoftimin të premten. Klubi anglez konfirmoi gjithashtu se do të ndërtojë një statujë të Guardiolës jashtë stadiumit dhe do t’i vendosë emrin e tij njërës prej tribunave.
Duke folur në konferencën e fundit për shtyp të sezonit me Barcelonën, Flick qeshi me idenë se ai mund të qëndrojë dhjetë vite në “Camp Nou”, ndërsa nuk kurseu lavdërimet për Guardiolën.
“Dhjetë vite… nuk besoj se do të më shihni mua këtu për aq kohë. Në moshën 70-vjeçare, nuk mendoj se ky është vendi ku duhet të jem. Ajo që ka bërë Guardiola, dhjetë vite në një klub në atë nivel, është diçka e pabesueshme. Gjithmonë kam thënë se ai është trajneri më i mirë në botë dhe e ka dëshmuar këtë çdo vit gjatë dhjetë viteve të fundit,” deklaroi Flick.
Ai shtoi se edhe në momentet më të vështira, Guardiola gjithmonë ka ditur si t’i menaxhojë situatat.
“Kur flasim për filozofinë e lojës, skuadrat e tij gjithmonë luajnë në nivelin më të lartë dhe ai gjithmonë gjen mënyrën për të qenë më i mirë se kundërshtarët. Nëse shikon trofetë që ka fituar, është diçka e jashtëzakonshme.”
Pas njoftimit për largimin, Guardiola deklaroi për “MEN” se ndihet plotësisht i lodhur dhe ka nevojë për pushim nga futbolli.
“Pushim. Nuk kam plane të trajnoj për një kohë. Përndryshe do të isha ende këtu. Kam nevojë të tërhiqem pak dhe nuk do të trajnoj për një periudhë.”
Në të kaluarën, Guardiola është lidhur shpesh me mundësinë për të drejtuar një kombëtare. Pas Kupës së Botës 2022, ai ishte objektiv i Brazil, ndërsa ka pasur edhe spekulime për një interes të mundshëm për stolin e England.
