Barcelona po intensifikon planet për të transferuar një sulmues të ri këtë verë, ndërsa kërkon zëvendësuesin e Robert Lewandowskit, i cili pritet të largohet.
Klubi katalanas ka përpiluar një listë me tre kandidatë kryesorë për të pasuar veteranin në rolin e numrit nëntë, dhe një prej tyre është superylli i Bayern Munichut dhe Anglisë, Harry Kane.
Megjithatë, presidenti i nderit i Bayernit, Uli Hoeness, u pyet për interesimin e Barcelonës ndaj Kane pasi 32-vjeçari shënoi “hat-trick” në fitoren ndaj Stuttgartit në finalen e DFB Pokal të shtunën, dhe ai shfrytëzoi rastin për të hedhur poshtë çdo mundësi transferimi, sipas “Diario AS”.
“Harry Kane është transferimi më i mirë që kemi bërë ndonjëherë. Bayerni është një klub që blen, jo që shet. Ai nuk do të largohet, dhe Barcelona gjithsesi nuk ka para”, tha ai.
Nuk ka dyshim se Kane do të ishte një transferim sensacional për Barcelonën.
Ai konsiderohet nga shumëkush si lojtari më i mirë në botë aktualisht dhe, me lojtarë si Lamine Yamali, Raphinha dhe Pedri që do ta furnizonin me topa, ai mund të arrinte statistika edhe më të mira se 61 golat që ka shënuar për Bayernin gjatë sezonit 2025/26.
Megjithatë, marrëveshja do të ishte jashtëzakonisht e vështirë për t’u realizuar, edhe nëse konfirmohet se Kane ka një klauzolë lirimi.
Sulmuesi anglez duket shumë i vendosur në Bavari dhe, megjithëse mundësia për t’iu bashkuar Barcelonës do të ishte tërheqëse, nuk ka asnjë garanci se ai do të insistonte për ta bërë realitet transferimin
