Emiratet e Bashkuara Arabe dhe Izraeli po afrohen gjithnjë e më shumë, ndërsa Arabia Saudite po forcon bashkëpunimin me Egjiptin, Turqinë dhe Pakistanin. Këto zhvillime po tregojnë për përçarje të reja në rajonin e Gjirit Persik.
Nga pamjet e përgjithshme, duket sikur Emiratet e Bashkuara Arabe kanë zgjedhur një krah në kontekstin e tensioneve mes SHBA-së dhe Izraelit me Iranin — një zgjedhje që mund t’i largojë ato nga pjesa tjetër e botës arabe.
Këtë javë u raportua se Izraeli dhe Emiratet po krijojnë një fond të përbashkët mbrojtjeje, që do të mundësonte blerje të përbashkëta armësh. Raporti, i publikuar fillimisht nga “Middle East Eye”, citon burime amerikane anonime dhe nuk është konfirmuar zyrtarisht nga asnjë qeveri.
Sipas raportimeve, marrëveshja është diskutuar gjatë një vizite sekrete të kryeministrit izraelit Benjamin Netanyahu në Emiratet e Bashkuara Arabe, të cilën ai e bëri publike më 13 maj. Megjithatë, Emiratet e kanë mohuar se një vizitë e tillë ka ndodhur.
Ndërkohë, ambasadori amerikan në Izrael, Mike Huckabee, deklaroi se Izraeli i ka dhënë Emirateve sisteme mbrojtjeje ajrore për t’i ndihmuar kundër sulmeve nga Irani.
Këto zhvillime, së bashku me raportimet se Emiratet po largohen nga OPEC pas dekadash anëtarësimi, kanë shtuar analizat se rendi politik në Lindjen e Mesme po ndryshon ndjeshëm.
Sipas analistëve, po formohen dy blloqe kryesore: një bosht Emiratet–Izrael dhe një bllok tjetër që përfshin Arabinë Saudite, Pakistanin, Turqinë dhe Egjiptit.
Disa ekspertë e përshkruajnë këtë si një “rishpërndarje të re të fuqisë” në rajon, e cila nuk është e ngurtë si aleancat tradicionale të së kaluarës.
Sipas tyre, këto vende nuk po zgjedhin domosdoshmërisht “anë fikse”, por po përshtaten me një situatë shumë të paqëndrueshme gjeopolitike
