Më 30 maj 2026, sytë e botës shqiptare do të jenë të drejtuar nga Londra. Në arenën legjendare Wembley, aty ku janë shkruar faqet më të mëdha të historisë së boksit profesionist, kampioni shqiptar i botës në versionin IBO, Jurgen Uldedaj, do të ngjitet sërish në ring për të mbrojtur titullin e tij ndaj amerikanit të pamposhtur Muhsin Cason.
Kjo përballje konsiderohet një nga momentet më të rëndësishme në historinë e boksit shqiptar. Eventi madhështor organizohet nga BOXXER dhe do të transmetohet LIVE në BBC iPlayer, duke vendosur Shqipërinë në qendër të vëmendjes së sportit profesionist ndërkombëtar.
Rrugëtimi i Jurgen Uldedajt drejt majave të boksit ka qenë një histori sakrifice, disipline dhe përkushtimi të jashtëzakonshëm. Nga Shqipëria drejt Gjermanisë dhe më pas Anglisë, ai ka ndërtuar me punë të palodhur profilin e një sportisti elitar, duke u bërë pjesë e promotoreve më të mëdha të botës si Matchroom Boxing, Queensberry Promotions dhe tashmë BOXXER.
Pas një serie fitoresh mbresëlënëse dhe performancash të nivelit të lartë, Uldedaj arriti të shpallet kampion bote në versionin IBO, duke hyrë në histori si një nga boksierët shqiptarë më të suksesshëm të të gjitha kohërave.
Sot ai ngjitet në ring jo vetëm si kampion bote, por si përfaqësues i flamurit kuqezi, i emrit shqiptar dhe i krenarisë së një kombi të tërë. Një tjetër fitore në Wembley do ta mbante Jurgenin në elitën botërore të boksit profesionist dhe do t’i hapte rrugën sfidave edhe më të mëdha ndërkombëtare.
Tashmë thirrja është për të gjithë shqiptarët, veçanërisht ata që jetojnë në Angli dhe në mbarë Europën, që të jenë pranë kampionit shqiptar dhe ta bëjnë Wembley-n të jehojë kuqezi.
“Nga sakrifica në histori. Nga Shqipëria në Wembley.”
