Kur konferenca për shtyp e trajnerit të Brazilit, Carlo Ancelotti, po i afrohej fundit, italiani vendosi të prekë një nga temat më të debatueshme në futbollin brazilian.
“Njerëzit ndonjëherë thonë se Brazili nuk ka një yll të madh aktualisht. Ndoshta kjo është e vërtetë. Nuk kemi një Pele, një Romario apo një Ronaldo, por mund të kemi një ndjenjë të përbashkët përgjegjësie dhe kjo mund të jetë shumë e fuqishme”, deklaroi Ancelotti para miqësores ndaj Panamasë në fund të muajit maj.
Megjithatë, shumëkush mendonte se deri tani Vinicius Junior do të ishte shndërruar në liderin absolut të “Seleçaos”. Katër vite pas eliminimit dramatik nga Kroacia në çerekfinalen e Botërorit 2022, sulmuesi i Real Madridit vazhdon të përballet me pikëpyetje sa herë që vesh fanellën e Brazilit.
Pas humbjes 2-1 ndaj Francës në muajin mars, debati në mediat braziliane shkoi deri aty sa të shtrohej pyetja nëse Vinicius meritonte ende një vend në formacionin titullar.
Edhe ardhja e Ancelottit, trajnerit me të cilin braziliani ka kaluar vitet më të suksesshme të karrierës së tij te Real Madridi, nuk ka arritur ta shuajë këtë diskutim. Pyetja mbetet e njëjtë: pse Vinicius nuk arrin të tregojë me Brazilin të njëjtin nivel që shfaq me klubin spanjoll?
Statistikat tregojnë se ai është futbollisti brazilian me më shumë kontribute në gola gjatë ciklit aktual kualifikues për Botërorin, me shtatë gola dhe gjashtë asistime në 28 ndeshje. Megjithatë, këto shifra konsiderohen modeste krahasuar me ndikimin që ai ka pasur te Real Madridi.
Ish-ndihmëstrajneri i Brazilit, Cleber Xavier, beson se diferenca qëndron te struktura e ekipit.
“Është e vështirë të luash në të njëjtin nivel si te klubi. Në kombëtare nuk ke të njëjtin ritëm stërvitjesh, të njëjtët bashkëlojtarë dhe as kohën e nevojshme për të ndërtuar automatizma. Shembulli më i mirë është Lionel Messi me Argjentinën. Edhe ai u kritikua për vite të tëra derisa Argjentina krijoi një ekip të konsoliduar dhe fitoi Botërorin në vitin 2022”, tha Xavier.
Vetë Vinicius nuk i është shmangur kurrë kritikave.
“Te klubi luajmë çdo tre ditë dhe gjithmonë kemi një mundësi të re për t’u përgjigjur. Në kombëtare kalon shumë kohë mes ndeshjeve dhe presioni është gjithmonë i madh. Nëse në Botëror shënoj katër ose pesë gola dhe bëhemi kampionë, atëherë e gjithë historia ndryshon”, deklaroi ai.
Një tjetër aspekt që ndikon në perceptimin e tifozëve është krahasimi i vazhdueshëm me Neymarin. Edhe pse sulmuesi i Santosit është larg formës së tij më të mirë dhe është përballur me shumë dëmtime vitet e fundit, ai vazhdon të gëzojë një lidhje të veçantë emocionale me publikun brazilian.
Eksperti i marketingut sportiv, Eduardo Musa, thekson se Neymar ndërtoi një trashëgimi të fortë që në vitet e tij te Santos.
“Neymar është golashënuesi më i mirë në historinë e kombëtares dhe tifozët brazilianë e kanë parë të luajë çdo javë në kampionatin vendas para se të largohej në Europë. Vinicius u transferua shumë herët dhe nuk pati kohë të krijonte të njëjtën lidhje me publikun”, shpjegon ai.
Pavarësisht kësaj, Federata Braziliane e Futbollit po përpiqet prej kohësh t’i japë Viniciusit një rol më të rëndësishëm. Në muajin mars, pas dëmtimit të Rodrygos, atij iu besua fanella me numrin 10 dhe u vendos në qendër të vëmendjes mediatike si fytyra e re e kombëtares.
Megjithatë, rikthimi surprizë i Neymarit bëri që fanella legjendare t’i rikthehej veteranit 34-vjeçar.
Tani, teksa Brazili synon titullin e gjashtë botëror në vitin 2026, shumë sy do të jenë të drejtuar nga Vinicius Junior. Sulmuesi i Real Madridit është i vetëdijshëm për pritshmëritë dhe nuk i shmanget përgjegjësisë.
“Sot jam ai për të cilin flasin të gjithë. Kam pesë ose gjashtë sezone shumë të mira te Real Madridi dhe prej vitesh jam mes lojtarëve më të mirë në botë. Kjo sjell më shumë përgjegjësi dhe unë e dua atë përgjegjësi, sepse e di që mund të jap akoma më shumë”, përfundoi Vinicius.
