Një central i energjisë elektrike dhe impiant i desalinizimit të ujit në Kuvajt është sulmuar nga Irani për herë të dytë brenda dy ditësh, njoftoi më herët sot Ministria e Energjisë Elektrike, Ujit dhe Energjisë së Rinovueshme e Kuvajtit.
Dje, një zyrtar provincial iranian tha gjithashtu se një sulm me raketë nga SHBA-ja dëmtoi një impiant desalinizimi në vend. CNN ka kontaktuar ushtrinë amerikane për një reagim.
Këto impiante, të cilat e shndërrojnë ujin e detit në ujë të pijshëm, janë jetike në Lindjen e Mesme, duke ofruar një burim thelbësor jetese dhe duke mbështetur disa rajone të largëta gjatë periudhave të thatësirës. Disa vende të rajonit varen pothuajse tërësisht nga desalinizimi për furnizimin me ujë të pijshëm.
Në Kuvajt dhe Oman, desalinizimi mbulon rreth 90% të nevojave për ujë të ëmbël. Në Bahrejn kjo përqindje është 85%, ndërsa në Arabinë Saudite rreth 70%. Qytetet kryesore të Gjirit, përfshirë Abu Dhabin, Dubain, Dohën, Qytetin e Kuvajtit dhe Xhedën, varen pothuajse tërësisht nga uji i desalinizuar.
Irani është më pak i varur nga desalinizimi për ujë të pijshëm sesa fqinjët e tij në Gjirin Persik. Megjithatë, ky proces është thelbësor për furnizimin me ujë të komuniteteve bregdetare dhe ishullore, si dhe për zbutjen e pasojave të thatësirave.
Impiantet e desalinizimit u vunë gjithashtu në shënjestër kur konflikti aktual nisi në muajin mars. Në atë kohë, Këshilli Botëror i Ujit — një organizatë e lidhur me OKB-në që mbron sigurinë globale të ujit — i dënoi sulmet dhe u bëri thirrje të gjitha palëve “t’i respektojnë plotësisht detyrimet e tyre sipas së drejtës ndërkombëtare”.
Në një deklaratë, organizata iu referua një neni të Konventës së Gjenevës që ua ndalon palëve ndërluftuese të sulmojnë burimet thelbësore për mbijetesën e civilëve, “siç janë objektet dhe furnizimet me ujë të pijshëm”.
