Presidenti kontrovers i Argjentinës, Javier Milei, ka bërë një reagim të pazakontë në rrjetet sociale, duke pretenduar se vendet e tjera janë “xheloze” për Argjentinën, pasi më shumë se 23 milionë persona kanë nënshkruar një peticion që kërkon përjashtimin e kombëtares nga Botërorët e ardhshëm.
Të dielën e kaluar (19 korrik), goli i Ferran Torres në vazhdime i siguroi Spanjës titullin e dytë në histori të Kupës së Botës.
Lionel Messi dhe bashkëlojtarët e tij nga Argjentina u desh të kënaqeshin me vendin e dytë, pasi kishin fituar Botërorin e vitit 2022 në Katar.
Leandro Paredes nuk e përjetoi mirë humbjen dhe u përfshi në përplasje fizike me Gavi dhe Eric Garcia të Spanjës, ndërsa bashkëlojtari i tij Nahuel Molina dukej se tentoi të godiste me grusht kapitenin e “La Roja”, Rodri.
FIFA ka hapur një hetim për skenat e shëmtuara që ndodhën pas ndeshjes.
Shumica e lojtarëve të Argjentinës gjithashtu i kthyen shpinën Spanjës teksa ajo ngrinte lart trofeun e Kupës së Botës, duke shkaktuar edhe më shumë kritika nga tifozët.
Dhe pothuajse një javë më vonë, drama vazhdon. Një peticion me titullin “Argentina Out” ka grumbulluar mbi 23.316.108 nënshkrime në më pak se një javë.
Tifozë nga 170 shtete të botës e kanë nënshkruar peticionin, duke kërkuar që Argjentina të përjashtohet nga Kupa e Botës për t’u “dhënë të gjithëve një shans të barabartë”.
Ndërkohë, tifozët argjentinas kanë nisur një kundërpeticion duke kërkuar që finalja të riluhet, duke akuzuar gjyqtarin e finales, Slavko Vinčić, për korrupsion.
Një pjesë e përshkrimit të peticionit thotë: “Finalja e fundit mes Argjentinës dhe Spanjës u njollos nga sjellja e diskutueshme dhe e korruptuar e gjyqtarit, i cili – sipas provave video – ishte korruptuar për të ndikuar në rezultatin e ndeshjes”.
Megjithatë, nuk ekziston asnjë provë që sugjeron se FIFA ose gjyqtari kanë qenë të korruptuar apo të ndikuar në çfarëdo forme.
Ndërsa presidenti i Federatës Argjentinase të Futbollit, Claudio “Chiqui” Tapia, u ka bërë thirrje tifozëve ta pranojnë fitoren e Spanjës, presidenti i vendit, Javier Milei, ka publikuar një seri postimesh të çuditshme në rrjetet sociale.
Lideri i krahut të djathtë postoi në Instagram duke sugjeruar se vendet e tjera janë xheloze për suksesin e Argjentinës.
“Problemi me Argjentinën është se ne dallohemi. Nuk kalojmë pa u vënë re, njerëzit janë xhelozë ndaj nesh dhe jemi të mirë pothuajse në gjithçka. Më vjen keq, por dikush duhej ta thoshte këtë”, shkroi ai.
Në një postim tjetër, ku shfaqej me një fanellë të Argjentinës të krijuar me inteligjencë artificiale nën një xhaketë, ai shkroi: “Rroftë Argjentina, dreqi e marrtë!”.
Ndërsa në një postim tjetër thuhej: “A ke armiq? Kjo do të thotë se dikur ke mbrojtur diçka. Ne mbrojmë Argjentinën”.
Më 24 korrik, trajneri i Spanjës, Luis de la Fuente, kritikoi ashpër sjelljen e Argjentinës pas finales së Botërorit, duke deklaruar për transmetuesin spanjoll “TVE”: “Në atë moment nuk e kuptova çfarë po ndodhte. Po festoja dhe po përqafohesha me kolegët. Por, në çdo rast, kjo është e patolerueshme, e papranueshme dhe nuk mund të lejohet. Lojtarë të atij niveli, të cilët i kam vlerësuar para ndeshjes dhe vazhdoj t’i vlerësoj, që janë futbollistë të mëdhenj me një trajner të jashtëzakonshëm, jam i sigurt se janë ndier po aq keq sa ne kur panë ato reagime. Dua të theksoj sjelljen tonë përballë atij lloj agresioni dhe provokimi. Lojtarët tanë e ruajtën gjithmonë qetësinë dhe u sollën si profesionistë të vërtetë”
