Pritet të jenë 24 orë të ngarkuara sa i përket largimeve tek Arsenali, pasi kampionët në fuqi të Premierligës kanë rënë dakord për shitjen e tre lojtarëve para se afati kalimtar të mbyllet të martën në mbrëmje.
Një numër i madh lojtarësh të ekipit të parë janë larguar nga klubi londinez në javët e fundit, përfshirë Christian Norgaard, Jakub Kiwior, Leandro Trossard dhe Reiss Nelson, i cili u largua me marrëveshje të përbashkët.
Sa i përket afrimeve, skuadra e Mikel Artetës ka shpenzuar afro 200 milionë funte për transferime këtë verë, me Bruno Guimaraes, Christos Tzolis, Piero Hincapie dhe Ezri Konsa që kanë mbërritur për shuma të konsiderueshme.
Megjithatë, duket se Arsenali do të rikuperojë një pjesë të kësaj shume në orët e fundit të afatit kalimtar.
“The Gunners” janë në bisedime të avancuara me Hamburgun për një marrëveshje prej 7.7 milionë funtesh për transferimin e Fabio Vieiras, i cili sezonin e kaluar ishte i huazuar te klubi gjerman, ku shënoi shtatë gola në 29 paraqitje në Bundesliga.
Shumëçka pritej nga Vieira kur iu bashkua Arsenalit nga Porto në vitin 2022 për një shumë të raportuar prej 34 milionë funtesh, por mesfushori portugez ka hasur vështirësi për të siguruar një vend të rregullt në formacionin e Artetës.
Në fakt, ai ka bërë vetëm 47 paraqitje për “The Gunners”, me vetëm pesë prej tyre si titullar në Premierligë.
Përveç Vieiras, Arsenali pritet të ndahet edhe me sulmuesin brazilian Gabriel Martinelli.
25-vjeçari, i cili ka shënuar 62 gola në 278 paraqitje gjatë shtatë viteve të tij në veri të Londrës, është pranë transferimit te skuadra e Saudi Pro League, Al Hilal, për rreth 65 milionë euro (55.7 milionë funte).
Nëse marrëveshja finalizohet, Arsenali do të përfitojë një shumë rekord për shitjen e një lojtari, duke tejkaluar 35 milionë funte që mori nga Liverpool për Alex Oxlade-Chamberlain në verën e vitit 2017.
“Besoj se të gjithë e dinë dhe e kuptojnë se sa shumë e duam Gabin”, tha Arteta para përballjes së Arsenalit me Aston Villan në Premierligë të hënën.
“Cilido qoftë rezultati, ai do të jetë i tillë sepse të gjithë bien dakord për të”, shtoi ai.
Edhe Gabriel Jesus pritet të largohet nga klubi, duke ndjekur Martinellin. Sulmuesi brazilian, i cili ka qenë i dëmtuar shpesh dhe ka pasur vështirësi për të siguruar minuta të rregullta gjatë dy sezoneve të fundit, është pranë transferimit te Barcelona për rreth 8.5 milionë funte, plus bonuse.
29-vjeçari do të nënshkruajë një kontratë dyvjeçare me Barcelonën, sipas Fabrizio Romanos, i cili pretendon se Arsenali i ka “autorizuar” udhëtimin të hënën për t’iu nënshtruar testeve mjekësore.
Në total, Jesus ka shënuar 32 gola dhe ka dhuruar 22 asistime në 123 paraqitje për Arsenalin. Ai iu bashkua “The Gunners” nga Manchester City në vitin 2022 për 45 milionë funte.
