Ditën e sotme, ministria e Arsimit dhe Shkencës, ka njoftuar se janë publikuar rezultatet e PISA 2025. Në postimin e saj, ministria thotë se në bazë të rezultateve bëhet e ditur se performanca mesatare e nxënësve në shkencë –357 pikë dhe lexim – 340 pikë, rezultatet kanë mbetur përafërsisht në nivelin e vitit 2022, 357 pikë, respektivisht 342 pikë.
Më tej theksohet edhe se, në matematikë performanca mesatare është më e ulët për 5 pikë në krahasim me vitin 2022.
Lidhur me këtë, Agon Ahmeti, drejtor i organizatës ETEA. Ky i fundit, përmes një postimi në Facebook, ka thënë se, analfabetizmi ‘’funksional drejt totalitetit’’. Ahmeti shton se, sipas rezultateve të PISA’s, 85% e nxënësve kosovarë dështuan në matematikë, 84% në lexim dhe 79% në shkencë.
ANALFABETIZMI FUNKSIONAL DREJT TOTALITETIT
Sot dolën rezultatet e PISA-s: 85% e nxënësve kosovarë dështuan në matematikë, 84% në lexim dhe 79% në shkencë. Po mundohem me e thjeshtëzu çka do të thotë kjo për përditshmërinë e një 15-vjeçari.
◾️ MATEMATIKË:
Për me shku në qytet janë dy mënyra të mundshme:
– Rruga A: 30 km deri në një fshat, pastaj 40 km deri në qytet
– Rruga B: 60 km drejtpërdrejt në qytet
Cila rrugë është më e shkurtër?
Fatkeqësisht, 85% e nxënësve janë të prirur me zgjedh rrugën A sepse nuk arrijnë me kuptu që fillimisht duhet me i mbledh sa bëjnë 30+40 për me kuptu që rruga B është 10 km më e shkurtër…
◾️ LEXIM:
Lexoni tekstin “Arta e kishte pritur gjithë javën piknikun e së dielës. Çantën e mbante afër shtratit që nga e mërkura. Kur u zgjua të dielën në mëngjes dhe e pa shiun nga dritarja, çantën e futi përsëri në dollap”.
Pse Arta e futi çantën përsëri në dollap?
Fatkeqësisht, 84% e nxënësve nuk arrijnë me kuptu që Artës ia prishi shiu planet për piknik…
◾️ SHKENCË:
Dy peshqirë të njëjtë lagen me të njëjtën sasi uji. Njëri shtrihet, tjetri lihet i palosur. Pas dy orësh, peshqiri i shtrirë është i terur, ndërsa i palosuri jo, pse?
Fatkeqësisht, 79% e nxënësve nuk arrijnë me kuptu që peshqiri i shtrirë ka më shumë sipërfaqe në kontakt me ajrin dhe rrjedhimisht uji avullon më shpejt…’’, ka shkruar Ahmeti.
