Franca është kualifikuar në çerekfinale të Ligës së Kombeve, pasi e mposhti Turqinë me rezultat 2-1 në “Stade Atlantique”, duke siguruar edhe vendin e parë në grupin e Ligës A.
Pas humbjes befasuese nga Italia, francezët kishin nevojë për fitore për të siguruar kualifikimin. Skuadra e drejtuar nga Zinedine Zidane e mori iniciativën që nga fillimi, por hasi në rezistencë të fortë të mbrojtjes turke.
Adrien Rabiot, Kylian Mbappe dhe Bradley Barcola provuan të rrezikonin portën kundërshtare, por portieri Berke Ozer u tregua në nivel, duke i ndalur tentimet e tyre. Edhe Michael Olise ishte pranë golit me një goditje të fuqishme, ndërsa Mike Maignan u tregua i vëmendshëm në rastin e Ismail Yuksek.
Franca e nisi furishëm pjesën e dytë dhe kaloi në epërsi në minutën e 48-të. Pas një goditjeje nga këndi të Rayan Cherkit, Rabiot e devijoi topin në shtyllën e parë, ndërsa Emirhan Topcu e dërgoi në rrjetën e portës së tij.
Turqia arriti të shënonte pak minuta më vonë përmes Arda Gulerit, por goli u anulua për pozitë jashtë loje.
Në minutën e 80-të, Eli Junior Kroupi, në debutimin e tij me kombëtaren franceze, realizoi golin e dytë pas një aksioni të bukur të kombinuar me Cherkin.
Turqit shënuan në minutën e 90-të me Abdulkerim Bardakcin, por nuk arritën të shmangnin humbjen 2-1.
Kështu, Franca siguroi çerekfinalen dhe vendin e parë në grup, ndërsa Turqia u bë kombëtarja e parë pas Islandës që i humb të gjashtë ndeshjet e fazës së grupeve në Ligën A të Ligës së Kombeve.
Në anën tjetër, Zidane ka regjistruar katër fitore në gjashtë ndeshjet e para në krye të Francës.
