Arkeologët supozojnë se sistemet janë përdorur si pjesë e një fabrike prodhuese.
Një ekip arkeologësh izraelitë ka zbuluar dy sisteme kanalesh të paparë më parë në Jerusalem pas kryerjes së gërmimeve në vendin arkeologjik Givati në Parkun Kombëtar të qytetit të Davidit pranë Malit të Tempullit.
Strukturat datojnë 2800 vjet më parë kur ekzistonte Tempulli i Parë dhe ndoshta i përkasin të njëjtës strukturë të përdorur për disa lloje prodhimi. Kjo është bërë e ditur nga Jerusalem Post. Për të kuptuar dobinë e kanaleve të gjetura, shkencëtarët iu drejtuan edhe ekspertëve të mjekësisë ligjore.
Megjithatë, as ekspertët nuk kanë mundur të zbulojnë me saktësi funksionin e saj.
“Ne donim të kontrollonim nëse kishte mbetje organike apo gjurmë gjaku, kështu që kërkuam ndihmën e njësisë së forenzikës së policisë dhe kolegëve të tyre hetues nga e gjithë bota, por deri më tani pa rezultat”, tha Iftach Shalev, një studiues për Autoriteti i Antikiteteve të Izraelit.
Sipas profesorit Yuval Gadot, i përfshirë gjithashtu në hulumtim, enigma u thellua vetëm kur u gjet sistemi i dytë, i përbërë nga të paktën pesë kanale që transportonin lëngje.
Megjithatë, arkeologët kanë arritur të përcaktojnë se strukturat pushuan së përdoruri në fund të shekullit të 9-të para Krishtit. Aktualisht besohet se ajo që prodhohej në këto struktura ishte ndoshta e rëndësishme për ekonominë e mbretërisë së Judesë, pasi ndodhej pranë tempullit dhe pallatit të mbretit.
