Rusia “po monitoron nga afër dhe mirëpret” suksesin e partisë së presidentit serb Aleksandar Vuçiq në zgjedhjet parlamentare në atë vend, tha më 18 dhjetor në Moskë zëdhënësi i Kremlinit Dimitriy Peskov.
Duke komentuar rezultatet preliminare të zgjedhjeve parlamentare në Serbi, Peksov tha se “është ekskluzivisht çështje e brendshme e Serbisë miqësore dhe vëllazërore ndaj Rusisë”, por se Moska “sigurisht e mirëpret këtë sukses të zotit Vuçiq”, transmeton Tass.
Peskov shprehu shpresën se kjo do të kontribuojë në zhvillimin e mëtejshëm të Serbisë dhe shpresën se “rruga e forcimit të mëtejshëm të miqësisë, bashkëpunimit reciprokisht të dobishëm dhe respektit” mes dy vendeve do të vazhdojë.
Në zgjedhjet e jashtëzakonshme parlamentare në Serbi, fitoi lista e mbledhur rreth Partisë Progresive Serbe (SNS) në pushtet “Aleksandar Vuçiq – Serbia nuk duhet të ndalet”.
Pas procesimit të 94,74 për qind të votave në zgjedhjet parlamentare, lista zgjedhore “Aleksandar Vuçiq – Serbia nuk guxon të ndalet” ka fituar 46,87 për qind të votave, sipas të dhënave në ueb faqen e Komisionit Republikan të Zgjedhjeve (RKZ).
Lista më e madhe e opozitës, “Serbia kundër dhunës”, e cila përbëhet nga një koalicion i gjerë i partive opozitare, ka fituar 23.34 për qind të votave.
