Bashkimi Evropian nuk ka dhënë datë të saktë se kur do t’i heq masat e vendosura ndaj Kosovës të cilat janë vendosur që nga 28 qershori i vitit të kaluar.
Brukseli ka qenë i qartë se masat mund të hiqen vetëm nëse do të zbatohen kushtet që Josep Borell kishte vendosur më 3 qershor për de-eskalimin e situatës në veri, ku përfshihen zvogëlimi i policisë speciale, largimi i kryetarëve dhe mbajtja e zgjedhjeve të reja.
Zëdhënësi i Bashkimit Evropian, Peter Stano, ka deklaruar për Front Online se masat janë të kthyeshme, por që njëherë nuk mund të hiqen.
“Këto masa janë të kthyeshme, por Kosova ende nuk i ka përmbushur plotësisht ato kërkesa. Kjo është arsyeja pse BE-ja ende po zbaton masa ndaj Kosovës, siç janë përcaktuar qartë në Konkluzionet e GAC, të miratuara unanimisht nga të 27 Shtetet Anëtare të BE-së në dhjetor”, ka thënë Stano.
Sipas tij, të gjitha kërkesat tashmë janë të qarta për Kosovën. “BE-ja ka bërë kërkesa specifike për de-përshkallëzimin e situatës ndaj Kosovës dhe ato i janë komunikuar qartë dhe në mënyrë të përsëritur palës kosovare”, ka shtuar ai.
Presidentja e Kosovës, Vjosa Osmani e kryeministri Albin Kurti në vazhdimësi kanë kërkuar heqjen e masave duke i konsideruar si të padrejta dhe jo proporcionale, megjithatë BE është e prerë në kërkesën për plotësim të kushteve në këmbim të heqjes së masave.
Ndërsa, edhe sot zv.kryeministri i Kosovës, Besnik Bislimi gjatë raportimit në Komisionin për Integrime Evropiane ka deklaruar se nuk ka ende vendim për heqjen e masave nga Bashkimi Evropian. Ai tha po ashtu se Kosova i ka zbatuar pikat e planit katërpikësh që i ishin kërkuar.
Kujtojmë se muajin e kaluar, më shumë se dhjetë vende evropiane i kërkuan Josep Borrellit të heqë kufizimet politike dhe ekonomike ndaj Kosovës, duke vënë në dukje gjithashtu rolin destruktivë që Serbia kishte luajtur në një sulm në Banjskë në shtatorin e kaluar.
