Autoriteti Kosovar i Konkurrencës ka refuzuar pjesëmarrjen në takimin e thirrur për nesër nga deputetja e Lidhjes Demokratike të Kosovës, Hykmete Bajrami, lidhur me vendimin për kalimin e bizneseve në tregun e hapur të energjisë elektrike.
Përmes një njoftimi në faqen zyrtare, AKK ka bërë të ditur se vendimi për mospjesëmarrje bazohet në mandatin kushtetues dhe ligjor të Autoritetit të Konkurrencës, si dhe në nevojën për ruajtjen e pavarësisë dhe paanshmërisë institucionale, që janë shtyllat themelore për funksionimin dhe integritetin e institucionit.
Në njoftim citohet neni 21, paragrafi 1 i Ligjit për Mbrojtjen e Konkurrencës.
“Kjo dispozitë nënvizon domosdoshmërinë që Autoriteti të veprojë vetëm mbi bazën e ligjit dhe të kompetencave të tij, pa u përfshirë në format politike, debate ad-hoc apo iniciativa që nuk zhvillohen në përputhje me strukturat zyrtare shtetërore.
Më tej, në rrethanat aktuale ku Kuvendi i Republikës së Kosovës nuk është i konstituar, Autoriteti nuk është në pozitë institucionale për të ndërvepruar me grupe parlamentare, deputetë individualë apo organizata me natyrë politike jashtë kuadrit formal të Kuvendit”, ka thënë AKK.
