Guvernatori i Bankës Qendrore të Kosovës (BQK), Ahmet Ismaili, së bashku me zëvendësguvernatoren Nesrin Shileku-Shala dhe ekipin e tij, zhvilluan një takim me përfaqësues të Fondit Monetar Ndërkombëtar (FMN), të udhëhequr nga shefi i misionit, Arkadiusz Majewski.
Takimi u mbajt në kuadër të asistencës teknike të FMN-së për rishikimin dhe zbatimin e Kodit të Transparencës për Bankat Qendrore, një nismë që synon forcimin e qeverisjes së mirë dhe rritjen e besimit publik në institucionet financiare.
Guvernatori Ismaili falënderoi FMN-në për mbështetjen e vazhdueshme dhe theksoi rëndësinë e transparencës në sistemin bankar, duke e cilësuar si një faktor kyç për zhvillimin ekonomik dhe stabilitetin financiar në vend.
Gjatë vizitës, misioni i FMN-së analizoi praktikat e BQK-së në fushën e komunikimit dhe bashkëpunimit me institucionet, sektorin financiar dhe publikun. Ky proces ka për qëllim rritjen e efektivitetit dhe llogaridhënies, duke e përafruar Kosovën me standardet ndërkombëtare.
Ky projekt pason praktika të ngjashme në rajon dhe tregon përkushtimin e BQK-së për avancim institucional dhe ndërtim të një sistemi financiar më transparent dhe të besueshëm.
