Të mërkurën, vendi do të përballet me një ndryshim të papritur dhe të theksuar të motit si pasojë e depërtimit të një fronti të ftohtë dhe të fuqishëm ajror.
Sipas parashikimeve, ky sistem pritet të sjellë shtim të ndjeshëm të vranësirave, të shoqëruara herë pas here me reshje lokale shiu. Në disa zona, reshjet do të marrin karakter rrebeshesh, të shoqëruara me vetëtima dhe bubullima.
Një ndër karakteristikat më të theksuara të kësaj goditjeje atmosferike do të jetë era e fuqishme që do të fryjë nga veriu. Në intervale të caktuara, pritet që ajo të arrijë shpejtësi nga 20 deri në 70 kilometra në orë, duke shtuar më tej ndjesinë e të ftohtit dhe duke vështirësuar ndjeshëm kushtet e zakonshme klimatike të sezonit.
Temperaturat do të pësojnë luhatje të theksuara, veçanërisht gjatë ditës. Parashikohet që minimalet të lëvizin ndërmjet 14 dhe 19°C, ndërsa maksimalet do të bien nga vlerat e zakonshme verore në një interval më të freskët prej 16 deri në 26°C. Megjithatë, pritet një ulje drastike gjatë ditës, sidomos në veri të Kosovës, ku temperaturat do të zbresin nën 15°C që në orët e para të mëngjesit.
Kjo rënie e ndjeshme termike do të vijojë gjatë gjithë ditës, duke u shtrirë gradualisht edhe në pjesën jugore të vendit. Si rezultat, pritet një ndërprerje e përkohshme e stabilitetit dhe ngrohtësisë që ka karakterizuar javët e fundit të verës.
Qytetarët këshillohen të përgatiten për këtë ndryshim të shpejtë të motit, të shmangin lëvizjet e panevojshme gjatë orëve kur era dhe rrebeshet mund të jenë më të forta, si dhe të kenë kujdes me veshjen, pasi luhatjet e temperaturës do të jenë të ndjeshme dhe mund të ndikojnë në gjendjen shëndetësore.
