Ambasadori i Mbretërisë së Bashkuar në Kosovë, Jonathan Hargreaves, ka shprehur shqetësimin për krizën institucionale në vend, duke e cilësuar atë më serioze sesa perceptohet gjerësisht.
Në një intervistë për Radio Gorazdevac të publikuar të mërkurën, Hargreaves theksoi se ndonëse pritet një vendim nga Gjykata Kushtetuese, zgjidhja e vërtetë duhet të vijë nga kompromisi mes partive politike.
“Gjykata Kushtetuese ka një rol të rëndësishëm, por problemi është më i thellë se një çështje ligjore. Nevojitet marrëveshje politike – ky është thelbi i problemit,” u shpreh ai.
Ambasadori shtoi se Kushtetuta dhe ligjet janë vetëm kuadri, ndërsa është përgjegjësi e partive që të bien dakord për rrugën përpara.
Duke folur për zgjedhjet lokale të pritshme në vjeshtë, Hargreaves i bëri thirrje të gjitha komuniteteve, veçanërisht komunitetit serb, që të marrin pjesë dhe ta shfrytëzojnë këtë mundësi për përfaqësim dhe integrim në institucionet e vendit.
