Futbolli shqiptar sonte është para një mbrëmjeje vendimtare, ku katër skuadra do të zbresin në fushë me synimin e madh për të siguruar një vend në play-offin e garave të UEFA-s.
Drita e Gjilanit, pas humbjes 3:2 në Bukuresht ndaj FC Steaua, kërkon përmbysjen historike në stadiumin “Fadil Vokrri”. Skuadra e Ardian Nuhiut beson se përpara tifozëve të saj mund të shfrytëzojë çdo mundësi për të përmbysur rezultatin dhe për të vazhduar rrugëtimin europian.
Dinamo e Tiranës ka përballë një sfidë po aq të vështirë ndaj Hajduk Splitit. Pas disfatës minimale 2:1 në Poljud, “Blutë” synojnë një paraqitje të madhe para publikut kryeqytetas për të eliminuar kroatët.
Egnatia, surpriza e këtij edicioni, do të kërkojë të vulosë kualifikimin pas barazimit 0:0 në fushën e Ljubjanës. Me mbështetjen e tifozëve në shtëpi, kampionët e Shqipërisë kanë shansin e artë për të hedhur një hap historik.
Ballkani, pas fitores 1:0 në “Fadil Vokrri” ndaj Shamrock Rovers, udhëton në Irlandë me një avantazh të lehtë, por të çmuar. Kampionët e Kosovës shpresojnë të menaxhojnë ndeshjen dhe të sigurojnë kalimin në fazën tjetër.
Sonte, të katër ekipet shqiptare kanë mundësinë të shkruajnë kapituj të rinj në historinë e futbollit tonë dhe të bëjnë që flamuri kuqezi të valojë më gjatë në garat europiane.
