Gati një milion hektarë pyje janë djegur në Bashkimin Evropian që nga fillimi i vitit – katër herë më shumë se mesatarja e dy dekadave të fundit. Spanja, Portugalia dhe Rumania janë ndër vendet më të goditura, ndërsa zjarret rekord kanë çliruar 35 megaton CO₂ në atmosferë.
Deri tani, afro një milion hektarë tokë janë përfshirë nga flakët këtë vit në BE, çka përbën rreth një të tretën e sipërfaqes së Belgjikës dhe është katërfish më shumë se mesatarja e regjistruar që nga fillimi i matjeve në vitin 2006, sipas të dhënave më të fundit nga Sistemi Evropian i Informacionit për Zjarret në Pyje, një indikator i vëzhguesit evropian Copernicus.
Deri më 19 gusht, zjarret kanë djegur gjithsej 967.023 hektarë, ndërsa për të njëjtën periudhë kohore mes viteve 2006–2024, mesatarja ishte 244.011 hektarë.
Spanja është vendi më i prekur me afro 392.000 hektarë të djegura, e ndjekur nga Portugalia me 261.000 hektarë dhe Rumania me 126.000 hektarë. Edhe Italia, Greqia, Franca dhe Bullgaria kanë humbur dhjetëra mijëra hektarë në flakë.
Emetimet e CO₂ të shkaktuara nga këto zjarre kanë arritur gjithashtu nivele rekord. Zjarret në kontinentin evropian kanë çliruar 35 megatonë CO₂ në atmosferë, krahasuar me një mesatare prej 15 megatonësh për të njëjtën periudhë, sipas të dhënave të mbledhura mes viteve 2003 dhe 2024.
As rajonet kufitare të BE-së nuk janë kursyer – Mbretëria e Bashkuar, Turqia, Shqipëria, Maqedonia e Veriut dhe Bosnja e Hercegovina po ashtu janë goditur nga zjarre të shumta.
