Ishte “vetëm” një ndeshje miqësore, por Karim Adeyemi me siguri do të marrë shumë besim nga fitorja 5-2 ndaj FC Baselit.
Pas transferimit nga Borussia Dortmundi te Barcelona, Adeyemi e shënoi golin e tij të parë me fanellën e katalanasve ndaj skuadrës zvicerane dhe mori gjithashtu lëvdata të shumta nga mediat spanjolle.
24-vjeçari “bëri një deklaratë” dhe “shkëlqeu veçanërisht” në fitoren miqësore, shkroi “Marca”, e cila e cilësoi gjermanin edhe si “protagonistin e ndeshjes”, përcjell “Gazeta Express”.
Përveç golit të tij të parë, Adeyemi asistoi Hamza Abdelkarimin për rezultatin 2-1.
Vetëm aktivizimet e vona të Dani Olmos dhe Lamine Yamal e bënë rezultatin të sigurt në minutat e fundit.
Megjithatë, Adeyemi e zhvilloi “një ndeshje shumë të kompletuar” dhe ia dërgoi një “deklaratë” trajnerit Hansi Flick.
“Ai dëshiron ta sigurojë një vend në formacionin titullar. Në një repart ofanziv ku do të ketë një luftë jashtëzakonisht të fortë për vendet, gjermani po fiton ngadalë avantazh. Ai luajti mirë si në të djathtë, ashtu edhe në të majtë dhe ishte vendimtar”.
Edhe “Sport” e cilësoi Adeyemin si “yllin e mbrëmjes” dhe tha se ai e zhvilloi “ndeshjen e tij më të mirë të fazës përgatitore”: “Shpejtësia e tij është mbresëlënëse. Në këtë nivel, ai mund të jetë një afrim i madh i ri”.
Adeyemi iu bashkua Barcelonës në mesin e korrikut për vetëm 22 milionë euro, pas katër vitesh te Borussia Dortmundi.
Në vitin 2022, “verdhezinjtë” i kishin paguar rreth 30 milionë euro për anësorin.
Megjithatë, shuma e transferimit të Adeyemit mund të shkojë deri në 29 milionë euro përmes bonuseve, gjë që do ta minimizonte humbjen e Dortmundit nga kjo marrëveshje.
Për më tepër, Dortmundi i siguroi 35 për qind të një shitjeje të ardhshme të Adeyemit.
Pra, nëse 24-vjeçari largohet një ditë nga Barça për një shumë të madhe transferimi, Borussia Dortmundi do të përfitojë sërish ndjeshëm.
Nën drejtimin e trajnerit Niko Kovaç, Adeyemi e humbi vendin e tij të rregullt në sezonin e kaluar dhe, veçanërisht në pjesën e dytë të sezonit, shpesh e gjeti veten në rolin e një zëvendësuesi luksi.
Në përgjithësi, ai nuk arriti kurrë t’i përmbushte në mënyrë të qëndrueshme pritshmëritë e mëdha që u krijuan pas transferimit të tij nga RB Salzburgu në Dortmund.
Tani ai dëshiron ta bëjë një fillim të ri të suksesshëm nën drejtimin e Flickut te Barça, edhe pse përballet me një konkurrencë të jashtëzakonshme në një skuadër ku bëjnë pjesë yje si Yamal, Raphinha dhe Anthony Gordon.
Pas debutimit të tij në fillim të gushtit, Flick kishte folur me një ton jashtëzakonisht kritik për Adeyemin.
“Ai ka shumë më tepër potencial sesa tregoi. E kam parë tashmë një Karim më të mirë në stërvitje”, kishte thënë trajneri i katalanasve pas barazimit 2-2 ndaj Birmingham Cityt, ndeshje në të cilën Adeyemi luajti 45 minutat e para.
“Shumë gjëra” që Adeyemi bëri në ndeshje “nuk ishin aq të mira”, shpjegoi Flick.
“Por ai është vetëm në javën e parë të stërvitjes, kështu që kjo është normale. Shpejtësia dhe cilësia e tij në finalizim janë të mira, ai ka shumë potencial. Dhe mendoj gjithashtu se mund të na japë shumë”.
