Mohamed Salah zhvilloi të enjten mbrëma ndeshjen e tij të parë si titullar me Trabzonspor, por debutimi i plotë me klubin turk nuk shkoi siç kishte shpresuar ylli egjiptian.
Salah u largua me emocione nga Liverpooli në fund të qershorit, nëntë vjet pasi kishte mbërritur në “Anfield” nga Roma dhe ishte shndërruar në një prej figurave më të mëdha në historinë e klubit.
Pas përfundimit të Kupës së Botës, 34-vjeçari shfrytëzoi verën për të vendosur për hapin e radhës në karrierë dhe në fillim të gushtit nënshkroi kontratë dyvjeçare me Trabzonspor.
Fillim premtues, por zhgënjim në Evropë
Salah debutoi fillimisht si rezervist në barazimin 1-1 ndaj Kasimpasas në Superligën e Turqisë, duke u aktivizuar në minutën e 58-të.
Paraqitja e tij e shkurtër mori vlerësime pozitive nga një pjesë e mediave turke, sidomos pasi ishte shumë pranë golit të parë me klubin, kur një goditje nga afërsia pas një topi standard përfundoi pak jashtë shtyllës.
Të enjten, egjiptiani mori mundësinë e parë si titullar në ndeshjen e parë të “play-off”-it të Europa League ndaj Ferencvarosit.
Megjithatë, në atmosferën e zjarrtë të stadiumit “Akyazi”, Salah nuk arriti ta shpëtojë Trabzonsporin nga humbja 1-0 ndaj skuadrës hungareze.
Mbrëmja u bë edhe më e vështirë për vendasit pasi Chibuike Nwaiwu u ndëshkua me karton të kuq në fillim të minutave shtesë.
Trabzonspor tani duhet ta përmbysë disavantazhin prej një goli në ndeshjen e kthimit javën e ardhshme për të siguruar kualifikimin.
“Larg ditëve të lavdisë”
Pas ndeshjes, Salah nuk i shpëtoi kritikave të mediave turke.
Gazeta “Sozcu” përmblodhi reagimet e tifozëve duke shkruar se një pjesë e tyre mendon se egjiptiani “është larg ditëve të tij më të mira” dhe se transferimi mund të ketë qenë një gabim.
Megjithatë, të tjerë besojnë se atij i duhet më shumë kohë për t’u përshtatur dhe se forma e tij e vërtetë do të shihet në ndeshjet e ardhshme.
I njëjti medium e cilësoi fillimin e sezonit të Salah si “zhgënjyes”, duke shtuar se ai “nuk arriti t’i përmbushë pritshmëritë në ndeshjen e tij të parë në stadiumin Akyazi”.
Edhe “Canli Yayin” përdori një ton të ngjashëm, duke pretenduar se Salah “i ka ndarë tifozët” pas dy paraqitjeve të para, pasi ende nuk ka arritur të japë ndikimin e pritur.
“Fanatik” del në mbrojtje të Salah
Jo të gjitha mediat ishin kritike.
“Fanatik” vlerësoi mënyrën se si Ferencvarosi e neutralizoi yllin egjiptian, duke shkruar se mbrojtja e skuadrës hungareze e kishte markuar në mënyrë shumë efikase dhe praktikisht “e kishte mbytur” hapësirën e tij në sulm.
“Megjithatë, Salah u përpoq ta thyente këtë markim me një shpirt të madh luftarak, por nuk mjaftoi”, shkroi mediumi turk.
Kur luan sërish Salah?
Salah iu bashkua me vonesë fazës përgatitore të Trabzonsporit dhe ende nuk pritet të jetë plotësisht i përshtatur me bashkëlojtarët dhe kërkesat e skuadrës.
Megjithatë, pritshmëritë mbeten të larta dhe në Turqi besojnë se është vetëm çështje kohe para se egjiptiani të tregojë cilësitë që e bënë një prej sulmuesve më të rrezikshëm në Premier League.
Mundësia e radhës mund të vijë të dielën, më 23 gusht, kur Trabzonspor pret Istanbul Basaksehirin.
Basaksehir drejtohet nga ish-mesfushori i Liverpoolit, Nuri Sahin, ndërsa sezonin e kaluar e përfundoi Superligën në vendin e pestë.
Trabzonspor shpreson që eksperienca dhe cilësia e Salah ta ndihmojnë skuadrën të luftojë për titullin kampion, pasi sezonin e kaluar përfundoi në vendin e tretë, tetë pikë prapa kampionit Galatasaray.
