Ousmane Dembele ka përfshirë shokun e tij të skuadrës te Paris Saint-Germain, Khvicha Kvaratskhelia, në tre zgjedhjet e tij kryesore për Topin e Artë.
Sulmuesi 29-vjeçar fitoi Topin e Artë në vitin 2025, pas një sezoni të jashtëzakonshëm 2024-25, gjatë të cilit shënoi 35 gola dhe regjistroi 16 asistime në të gjitha garat për kampionët e Evropës, PSG-në.
Dembele, i cili fitoi edhe disa çmime individuale – përfshirë Lojtarin e Sezonit në Ligue 1 dhe Lojtarin e Sezonit në Ligën e Kampionëve – duket se nuk ka shumë gjasa ta mbrojë këtë herë kurorën e tij.
Përpara se të zbuloheshin të nominuarit të martën, Dembele u pyet të emëronte tre lojtarët e tij të preferuar, gjatë një interviste për “France Football”, organizatorin e Topit të Artë.
Ai tha: “Kvara, dhe Harry Kane, i cili pati një sezon shumë, shumë të mirë, dhe mendoj se Kylian Mbappe”.
Mbappe është kritikuar nga disa persona për qëndrimin e tij në garën për Topin e Artë të këtij viti. Duke folur përpara përballjes së Real Madridit me Interin në Champions League, francezi u shfaq mjaft i sigurt.
“Mendoj se kur luan për Real Madridin, klubin më të mirë në botë, njerëzit të lidhin me këtë çmim [Topin e Artë]”, tha ai.
“Ka shumë njerëz që flasin për mua dhe Topin e Artë. Sigurisht, kam shkruar historinë në kompeticionin më të rëndësishëm. Ndoshta është një vit i mirë për këtë, por njerëzit mund të votojnë bazuar në atë që mendojnë”, shtoi ai.
Në një intervistë tjetër për “France Football”, Mbappe tha: “Kam një ndjesi se mund ta fitoj këtë vit, ndaj nuk jam distancuar nga kjo mundësi”.
Dembele, nga ana tjetër, vlerësoi përpjekjet e Paris Saint-Germainit, në vend që të përqendrohej te arritjet e tij personale. Ai gjithashtu pati fjalë të mira për shokun e tij të skuadrës te PSG-ja, William Pacho.
“Unë? Oh, jo, kurrë nuk e vendos veten në çështje të tilla”, tha ai.
“Unë nuk votoj aspak për veten. Nëse do të isha unë ai që do të fliste, nuk do të votoja për veten. Ka edhe shumë lojtarë të tjerë. Michael Olise mund të ishte në listë, sepse pati një sezon të jashtëzakonshëm dhe ishte lojtari më i mirë në kampionatin gjerman, si dhe Lamine Yamal, Fabian Ruiz dhe (William) Pacho”, tha ai.
“E harrojmë këtë të fundit, Pacho”, shtoi Dembele.
“Shpresoj që të mos e harrojmë këtë vit, sepse ai e meriton”, e mbylli ai
