Fenerbahce ka konfirmuar se Ismail Kartal do të vazhdojë të jetë trajner i skuadrës, pavarësisht dorëheqjes së tij të paralajmëruar pas ndeshjes me Romën në Champions League.
Kartal ka njoftuar dorëheqjen pas barazimit 1-1 ndaj Romës të enjten, duke thënë se kishte vendosur të largohej për t’ia hapur rrugën klubit.
“Sonte dhashë dorëheqjen nga detyra. E mora këtë vendim për t’ia hapur rrugën klubit. U largova ndërsa rruga është ende e hapur, pa pasur asnjë synim për t’u kthyer”, kishte deklaruar Kartal.
Megjithatë, pronari i Fenerbahce, Aziz Yildirim, e ka kundërshtuar menjëherë largimin e trajnerit. Situata u bë edhe më e paqartë të premten, kur mediat turke raportuan se Kartal ishte bërë i paarritshëm pasi kishte fikur telefonin.
Klubi më vonë e ka konfirmuar zyrtarisht se trajneri nuk do të largohet.
“Trajneri ynë, z. Ismail Kartal, është në krye të detyrës. Ekipi ynë do të vazhdojë përgatitjet për ndeshjen ndaj Gaziantepit. Stërvitja e nesërme në orën 11:30 do të zhvillohet nën drejtimin e trajnerit tonë Ismail Kartal”, thuhet në njoftimin e klubit.
Sipas raportimeve të mediave turke, Yildirim ishte takuar të premten me Kartalin dhe e kishte bindur atë të qëndrojë. Trajneri raportohet se kishte marrë edhe gjërat e tij nga zyra, ndërsa nuk kishte drejtuar stërvitjen e së premtes.
Kartal ishte rikthyer në krye të Fenerbahce gjatë verës, për herë të katërt në karrierën e tij, pas largimit të trajnerit gjerman Domenico Tedesco në fund të sezonit 2025/26.
Klubi turk investoi rreth 100 milionë euro në përforcime gjatë verës, duke afruar emra si Mason Greenwood, Nathan Ake, Vedat Muriqi dhe Romelu Lukaku.
Megjithatë, fillimi i sezonit nuk ka shkuar sipas pritshmërive. Fenerbahce ka humbur dy nga katër ndeshjet e para në Superligën turke dhe aktualisht renditet në vendin e nëntë, gjashtë pikë prapa kampionit në fuqi, Galatasaray.
Fenerbahce do të përballet me Gaziantepin të hënën, më 14 shtator, në kuadër të xhiros së pestë të Superligës turke
