Irani i ka propozuar Shteteve të Bashkuara një plan shtatëditor për rihapjen e Ngushticës së Hormuzit, nëse plotësohen kushtet e paraqitura nga Teherani.
Ministri i Jashtëm iranian, Abbas Araghchi, tha të premten në OKB se plani i është përcjellë Uashingtonit përmes Katarit.
“Irani i ka përcjellë Shteteve të Bashkuara, përmes Katarit, një plan konkret shtatëditor. Nëse plotësohen kushtet e nevojshme, ngushtica mund të rihapet dhe kalimi normal detar të rikthehet brenda shtatë ditësh”, tha Araghchi.
Ai shtoi se vendimi tani i takon palës amerikane.
“Zgjedhja tani u takon Shteteve të Bashkuara. Irani nuk pranon detyrim, kërcënime apo frikësim dhe nuk do të heqë dorë nga të drejtat e tij sovrane nën presion”, tha ai.
Sipas raportimeve të mëhershme të mediave, plani parashikon ndalimin e armiqësive në Lindjen e Mesme për shtatë ditë, përfshirë edhe Libanin.
Po ashtu, sipas këtyre raportimeve, kërkohet lirimi i aseteve iraniane të ngrira, të vlerësuara në të paktën 12 miliardë dollarë, heqja e sanksioneve ndaj naftës iraniane dhe përfundimi i bllokadës detare amerikane ndaj Iranit.
Në ditën e shtatë të armëpushimit, Irani do ta rihapte Ngushticën e Hormuzit.
Zëdhënësi i Gardës Revolucionare, Hossein Mohebi, i tha AFP-së se edhe përfundimi i armiqësive në Jemen është ndër kërkesat e Teheranit.
Shtetet e Bashkuara dhe Irani kishin nënshkruar në qershor një memorandum mirëkuptimi që synonte përfundimin e luftës, rihapjen e ngushticës dhe nisjen e bisedimeve për programin bërthamor të Iranit.
Megjithatë, marrëveshja u prish pak kohë më vonë, pasi Irani hapi zjarr ndaj anijeve tregtare në Hormuz, të cilat i akuzoi se kishin devijuar nga rruga e miratuar prej tij.
