Nëntë persona janë arrestuar sot nga Policia e Kosovës nën dyshimin për kryerjen e krimeve të luftës në Kosovë dhe, me aktvendim të Prokurorisë Speciale, janë ndaluar për 48 orë.
Në një komunikatë të përbashkët për “Operacionin ‘Dosja 23’”, Prokuroria Speciale dhe Policia e Kosovës bënë të ditur se personat e arrestuar dyshohen për veprën penale “Krime lufte kundër popullsisë civile”.
“D.D., M.R., M.R., R.R., S.D., S.D., V.L., R.R dhe D.D dyshohen për kryerjen e veprës penale ‘Krime lufte kundër popullsisë civile’”, thuhet në komunikatë.
Sipas autoriteteve, hetuesit policorë nga Drejtoria për Hetimin e Krimeve të Luftës, të mbështetur edhe nga njësitë e tjera të Policisë së Kosovës, kanë zhvilluar kontrolle në disa lokacione në komunën e Zubin Potokut.
“Gjatë realizimit të bastisjes, janë sekuestruar këto prova materiale si në vijim”, thuhet në njoftim.
Autoritetet kanë bërë të ditur se gjatë bastisjeve janë sekuestruar:
- nëntë (9) telefona mobilë;
- dy (2) libreza ushtarake;
- një (1) armë e gjatë dhe një (1) pushkë gjuetie;
- fishekë të kalibrit 7.65 mm dhe fishekë të pushkës së gjuetisë;
- katër (4) predha;
- para të gatshme në shumën rreth 23,000 (njëzet e tre mijë) euro;
- para të gatshme në shumën rreth 60,000 (gjashtëdhjetë mijë) dinarësh serbë.
Prokuroria Speciale dhe Policia e Kosovës kanë theksuar nëse do të vazhdojnë angazhimin në rastet që lidhen me krimet e luftës.
“Prokuroria Speciale e Republikës së Kosovës dhe Policia e Kosovës, riafirmojnë përkushtimin dhe angazhimin në ndjekjen penale dhe sjelljen para drejtësisë të të gjithë personave të dyshuar për kryerjen e krimeve të luftës”, thuhet në komunikatën e përbashkët.
