Ndihmësi i Kremlinit, Yuri Ushakov, ka deklaruar se presidenti rus, Vladimir Putin, e ka ftuar presidentin ukrainas, Volodymyr Zelensky, në Moskë për të zhvilluar negociata të drejtpërdrejta, duke premtuar se do t’i sigurohen kushtet e nevojshme, përfshirë ato që lidhen me sigurinë e tij.
Sipas agjencisë shtetërore ruse të lajmeve TASS, Ushakov tha se kryeministri norvegjez, Jonas Gahr Støre, dhe presidenti finlandez, Alexander Stubb, i kishin përcjellë Putinit gjatë një bisede telefonike se Zelensky ishte i interesuar për zhvillimin e bisedimeve të drejtpërdrejta me kreun e Kremlinit.
“Lideri ynë përsëriti se, nëse Zelensky dëshiron vërtet të zhvillojë negociata të drejtpërdrejta, ai duhet të vijë në Moskë, ku do t’i sigurohen të gjitha kushtet e nevojshme, përfshirë ato që lidhen me sigurinë e tij”, deklaroi Ushakov.
Sipas tij, një tjetër çështje e rëndësishme e bisedës telefonike ishte mundësia e rifillimit të negociatave trepalëshe mes Rusisë, Ukrainës dhe Shteteve të Bashkuara në Abu Dhabi, kryeqytetin e Emirateve të Bashkuara Arabe.
“Pati shumë pyetje lidhur me këtë çështje dhe kërkesa për sqarime nga ana jonë”, u shpreh ai.
Sa i përket përfshirjes së vendeve evropiane në negociatat për përfundimin e luftës në Ukrainë, Ushakov tha se kjo çështje nuk është aktualisht në diskutim.
“Ne nuk po shqyrtojmë fare se kush mund ta përfaqësojë Evropën, pasi kjo do të vendoset në një fazë shumë më të vonshme”, theksoi ndihmësi i Kremlinit.
Ai bëri të ditur se telefonata mes Putinit, Støre dhe Stubb zgjati rreth 90 minuta dhe përfundoi me dakordësinë që palët të komunikojnë sërish nëse do të jetë e nevojshme.
