Irani i ka dërguar një paralajmërim të drejtpërdrejtë Shteteve të Bashkuara duke ekspozuar një poster gjigant në një shesh qendror të Teheranit, në një kohë kur anije luftarake amerikane po lëvizin drejt rajonit të Lindjes së Mesme.
Posteri, i vendosur në Sheshin Enghelab, paraqet një aeroplanmbajtëse amerikane me avionë luftarakë të dëmtuar ose në flakë. Në kuvertë shihen trupa të pajetë, ndërsa gjaku rrjedh në det duke formuar vija që simbolizojnë flamurin amerikan. Në poster shkruhet mesazhi kërcënues “Nëse mbjell erën, do të korrësh stuhinë”.
Autoritetet iraniane e shfaqën këtë imazh ndërsa aeroplanmbajtësja amerikane USS Abraham Lincoln, e shoqëruar nga anije të tjera luftarake, po afrohej drejt zonës. Presidenti amerikan Donald Trump ka deklaruar se dislokimi i flotës po bëhet “për çdo rast”, duke shtuar se mund të mos ketë nevojë për përdorimin e saj.
Sheshi Enghelab është i njohur për tubime dhe mesazhe të sponsorizuara nga shteti iranian, ndërsa pankarta e re është përshtatur sipas zhvillimeve të fundit politike dhe ushtarake. Ndërkohë, komandanti i Gardës Revolucionare të Iranit ka deklaruar se forcat e tij janë “më të gatshme se kurrë, me gishtin në këmbëz”.
Tensionet mes Uashingtonit dhe Teheranit janë rritur ndjeshëm pas shtypjes së protestave në Iran, ku mijëra persona u vranë dhe dhjetëra mijëra u arrestuan. Presidenti Trump ka paralajmëruar se SHBA-ja mund të ndërmarrë veprime ushtarake nëse regjimi iranian vazhdon me ekzekutime dhe dhunë ndaj protestuesve.
Trump ka pretenduar se Irani ka ndaluar ekzekutimin e rreth 800 protestuesve të arrestuar, një deklaratë që është mohuar nga prokurori i lartë iranian, i cili e ka cilësuar atë si “krejtësisht të pavërtetë”.
Nga ana tjetër, presidenti amerikan ka theksuar se çdo ndërhyrje e ardhshme ushtarake do t’i bënte sulmet amerikane të mëparshme ndaj objekteve bërthamore iraniane “të duken si kikirikë”. Sipas ushtrisë amerikane, SHBA-ja mban një prani të konsiderueshme ajrore në Lindjen e Mesme me avionë F-15E Strike Eagle, ndërsa Ministria Britanike e Mbrojtjes ka njoftuar se avionë luftarakë Typhoon janë dislokuar në Katar në funksion mbrojtës.
