Agjentët e Shërbimit Amerikan të Imigracionit dhe Doganave (ICE) pritet të vendosen në Itali gjatë Lojërave Olimpike Dimërore, që do të zhvillohen nga 6 deri më 22 shkurt, bëri të ditur një zëdhënës i ICE-së.
Sipas deklaratës zyrtare, Njësia e Inteligjencës së Sigurisë Kombëtare (HSI) e ICE-së do të mbështesë Shërbimin e Sigurisë Diplomatike të Departamentit Amerikan të Shtetit dhe autoritetet italiane, me qëllim vlerësimin dhe minimizimin e rreziqeve që lidhen me organizatat kriminale transnacionale.
“ICE nuk kryen operacione imigracioni jashtë territorit të Shteteve të Bashkuara dhe të gjitha masat e sigurisë gjatë Lojërave Olimpike do të jenë nën autoritetin e plotë të Italisë”, thuhet në deklaratë.
Reagimi i kryebashkiakut të Milanos
Prania e mundshme e agjentëve amerikanë ka shkaktuar reagime të forta politike. Kryebashkiaku i Milanos, Giuseppe Sala, deklaroi se agjentët e ICE-së “nuk janë të mirëpritur” në qytet. “Është e qartë se ata nuk janë të mirëpritur në Milano. Prania e kësaj force gjatë Lojërave Olimpike është problematike”, tha Sala për radion RTL 102.5, duke kritikuar ashpër praktikat e ICE-së. Autoritetet italiane fillimisht mohuan praninë e ICE-së, ndërsa më pas tentuan të minimizonin rolin e tyre, duke theksuar se çdo përfshirje do të kufizohej vetëm në mbrojtjen e delegacionit amerikan.
Zëvendëspresidenti i SHBA-së, J.D. Vance, dhe Sekretari i Shtetit, Marco Rubio, pritet të marrin pjesë në ceremoninë e hapjes së Lojërave më 6 shkurt. Ministri i Brendshëm italian, Matteo Piantedosi, deklaroi se “ICE nuk do të kryejë asnjë operacion në Itali”, duke theksuar se menaxhimi i rendit publik dhe sigurisë i përket ekskluzivisht autoriteteve italiane.
Edhe guvernatori i Lombardisë, Attilio Fontana, tha se roli i agjentëve amerikanë do të ishte vetëm mbrojtës, i kufizuar në sigurinë e zyrtarëve të lartë amerikanë. Megjithatë, stafi i tij sqaroi më vonë se nuk ka ende informacion zyrtar për praninë e ICE-së dhe se deklaratat e guvernatorit ishin hipotetike. Burime nga policia italiane konfirmuan se deri më tani nuk është nënshkruar asnjë marrëveshje bashkëpunimi për sigurinë e Lojërave Olimpike Dimërore.
“Sipas ligjit italian, rendi publik dhe siguria menaxhohen vetëm nga Ministria e Brendshme dhe strukturat e saj. Deri në këtë moment nuk ka konfirmim se agjentë të ICE-së do të shoqërojnë delegacionin amerikan”, thanë burimet, duke shtuar se përbërja e ekipit të sigurisë amerikane ende nuk i është komunikuar palës italiane.
