Situata në FIFA po bëhet gjithnjë e më e tensionuar.
Pas polemikave të forta rreth projektit të presidentit Gianni Infantino për krijimin e një kompanie të re që do t’i menaxhojë të drejtat komerciale të Kupës së Botës, kanë dalë në pah detaje të reja mbi mënyrën se si po kërkohet mbështetja e federatave anëtare.
Sipas raportimeve, FIFA ua ka bërë të ditur 211 federatave kombëtare se, nëse e miratojnë projektin deri më 19 shtator, do t’i përfitojnë 75% të fondeve të parashikuara menjëherë.
Në të kundërtën, federatat që nuk do ta mbështesin planin nuk do të kenë qasje në të njëjtin nivel financimi, përcjell “Gazeta Express”.
Projekti i Infantinos e parasheh krijimin e kompanisë FIFA Forward Enterprise, në të cilën një pjesë e aksioneve do t’u shitet investitorëve privatë.
Sipas presidentit të FIFA-s, kjo do të mundësojë rritje të ndjeshme të fondeve për zhvillimin e futbollit në të gjithë botën.
Megjithatë, shumë federata, UEFA dhe figura të rëndësishme të futbollit e kanë kundërshtuar ashpër këtë plan, duke e cilësuar si një hap të rrezikshëm drejt privatizimit të futbollit botëror dhe duke e kritikuar mungesën e transparencës në proces.
Afati i vendosur nga FIFA është 19 shtatori, datë deri në të cilën federatat duhet ta japin përgjigjen e tyre për projektin që e ka shkaktuar një nga përplasjet më të mëdha politike dhe institucionale në futbollin ndërkombëtar të viteve të fundit.
