Trajneri i Real Madridit, Jose Mourinho, ka hedhur poshtë idenë se Jude Bellingham, Kylian Mbappe dhe Vinicius Junior nuk mund të luajnë së bashku, duke theksuar se të tre yjet mund të përshtaten në të njëjtin formacion.
Real Madridi ka pasur vështirësi për të gjetur ekuilibrin e duhur taktik me tre lojtarët në fushë. Xabi Alonso u përball me këtë problem gjatë periudhës së tij në krye të skuadrës, ndërsa tashmë Mourinho duhet të gjejë zgjidhjen e duhur në rikthimin e tij në “Santiago Bernabeu”.
Para ndeshjes së parë të sezonit në La Liga ndaj Espanyolit, që zhvillohet të shtunën, Mourinho ka bërë të qartë se nuk e konsideron treshen si të papajtueshme.
“Janë lojtarë të jashtëzakonshëm dhe lojtarët e jashtëzakonshëm duan të luajnë me lojtarë të jashtëzakonshëm. Lojtarët më të mirë zhgënjehen kur luajnë me bashkëlojtarë që nuk janë në të njëjtin nivel”, ka deklaruar Mourinho.
Megjithatë, trajneri portugez pranon se sfida kryesore do të jetë gjetja e skemës së përshtatshme taktike për t’i bërë të tre yjet të ndihen komodë në fushë.
“Pas përshtatjeve taktike, mund të jetë pak më e vështirë. Për mua është më e vështirë të gjej formacionin perfekt për të tre, por kjo është sfida jonë. Dua që të tre të ndihen rehat duke luajtur së bashku”, u shpreh ai.
Mourinho beson se cilësia individuale e Bellinghamit, Mbappes dhe Viniciusit do ta bëjë të mundur funksionimin e tyre në të njëjtën skuadër.
“Jam shumë i bindur se kur të tre të luajnë së bashku, do të thoni se është diçka e shkëlqyer, sepse janë lojtarë me shumë cilësi. Nuk mendoj se pozicionet e tyre janë të papajtueshme”, theksoi trajneri i Real Madridit.
Ai është gjithashtu optimist për sezonin e ri dhe beson se treshja mund të luajë një rol vendimtar në objektivat e klubit.
“Jam shumë i bindur se do të kemi një sezon të shkëlqyer me ta”, përfundoi Mourinho.
Tashmë vëmendja është te ndeshja ndaj Espanyolit, ku Mourinho pritet të japë sinjalet e para për mënyrën se si synon t’i vendosë në fushë tre yjet e Real Madridit
