Mesfushori i Borussia Dortmund, Marcel Sabitzer, ka vendosur të bëjë një pushim nga Kombëtarja e Austrisë dhe nuk do të jetë në dispozicion për ndeshjet e Ligës së Kombeve gjatë këtij viti.
Lajmin e ka konfirmuar Federata Austriake e Futbollit, ndërsa tridhjetë e dy vjeçari do ta rishqyrtojë të ardhmen e tij me kombëtaren para fillimit të kualifikimeve për Euro 2028 në mars të vitit të ardhshëm.
Sabitzer, i cili ka zhvilluar 102 ndeshje dhe ka shënuar njëzet e shtatë gola me Austrinë, ka thënë se ka nevojë të menaxhojë ngarkesën e madhe të ndeshjeve.
“Dy vitet e fundit kanë qenë shumë intensive. Që nga Euro 2024 kam luajtur praktikisht tri sezone për shkak të Kupës së Botës për Klube dhe Kupës së Botës. Dua të vazhdoj të luaj në nivelin më të lartë edhe për disa vite, prandaj duhet ta menaxhoj energjinë me kujdes”, ka deklaruar ai.
Ai ka shtuar se vendimi është marrë në marrëveshje me trajnerin Ralf Rangnick dhe se në fillim të vitit të ardhshëm do të diskutojnë mundësinë e rikthimit për kualifikimet e Euro 2028.
Nga ana tjetër, Rangnick ka thënë se do t’i mungojë përvoja e Sabitzer, por e kupton vendimin e tij.
“Jam i kënaqur që Marcel mbetet i gatshëm të rikthehet nëse kemi nevojë për të. Kjo tregon se kombëtarja vazhdon të ketë rëndësi të madhe për të”, ka thënë ai.
Austria do të përballet me Izraelin më 24 shtator në Linz, me Kosovën më 27 shtator në Vjenë, më pas do të luajë ndaj Irlandës në Dublin më 1 tetor dhe sërish me Kosovën më 5 tetor në Prishtinë
