Manchester Unitedi vazhdon të ketë interes afatgjatë për mbrojtësin e Evertonit, Jarrad Branthwaite, teksa Michael Carrick tashmë e ka një sy te afati kalimtar i janarit.
Unitedi investoi shumë në mesfushë gjatë afatit kalimtar të verës dhe e la pas dore mbrojtjen, me Carrickun që po e ndien ndikimin e vendimit të INEOS për të mos shpenzuar më shumë për përforcime në repartin defensiv.
Djajtë e Kuq kanë pësuar shtatë gola në katër ndeshjet e para të Premierligës, katër prej të cilave ndaj skuadrave të sapo promovuara, Hull Cityt dhe Ipswich Townit, gjë që vetëm sa e ka theksuar se ku duhet të përmirësohen para janarit.
Carricku ka startuar me dyshen Harry Maguire dhe Lisandro Martinez në tri ndeshjet e fundit në elitë, por të dy mund të jenë duke iu afruar fundit të karrierave të tyre në “Old Trafford”.
Kontratat e tyre skadojnë në qershor të vitit 2027 dhe nuk është e garantuar se do t’i rinovojnë marrëveshjet, që do të thotë se rëndësia e investimit në atë pozitë është ndoshta më e madhe se kurrë.
Në mënyrë inkurajuese për Unitedin, duket se klubi tashmë po mendon për afatin kalimtar të janarit, me “talkSPORT” që ka zbuluar se 13-herë kampionët e Premierligës “vazhdojnë të kenë interes” për qendërmbrojtësin e Evertonit, Jarrad Branthwaite.
Djajtë e Kuq patën dy oferta për Branthwaite të refuzuara në verën e vitit 2024, ndërsa anglezi më pas e pa progresin e tij të pengohej nga dëmtimet, duke kaluar pjesën më të madhe të sezonit 2025/26 jashtë fushave.
Por 24-vjeçari tani është rikthyer në formë të plotë dhe po paraqitet sërish në nivelin e tij më të mirë, duke prodhuar paraqitje të jashtëzakonshme përkrah James Tarkowskit në katër ndeshjet e para.
Branthwaite gjithashtu i ka ndihmuar Toffees të mbajnë portën e paprekur ndaj Crystal Palace dhe Tottenham Hotspur, ndërsa ka treguar cilësitë e tij të jashtëzakonshme defensive dhe aftësinë për ta shpërndarë topin.
Unitedi dëshiron ta shtojë mbrojtësin e lindur në Carlisle në repartin e tij defensiv për këto dy arsye, pasi planifikon një rindërtim të madh të mbrojtjes në vitin 2027.
Dy vjet më parë, thuhej se Evertoni kërkonte rreth 70 milionë funte për Branthwaite dhe, duke qenë se kontrata e tij nuk skadon deri në qershor të vitit 2030, nuk do të ishte befasuese nëse klubi do të kërkonte një shumë të ngjashme.
Kur u pyet për partneritetin e tij me Branthwaite, Tarkowski e lavdëroi jashtëzakonisht shumë bashkëlojtarin e tij, duke e cilësuar “të mrekullueshëm” dhe duke vlerësuar atributet e tij të kërkuara.
“Ne kemi punuar disi në këtë me kalimin e kohës dhe Jazz është një partner i mrekullueshëm për ta pasur pranë vetes. Ai është i fortë si një ka, shumë i shpejtë, brilant me topin, i aftë t’i përdorë të dyja këmbët dhe komunikon shumë mirë”, tha Tarkowski pas barazimit pa gola me Spurs.
“Vitin e kaluar ishte e vështirë për të. Ai nuk luajti shumë ndeshje dhe humbi shumë futboll, por është rikthyer në formë dhe po shkëlqen, dhe sonte e pamë cilësinë që ka, numrin e ndërhyrjeve dhe bllokimeve që bën, por gjithashtu është shumë i qetë dhe komod me topin. Kështu që shpresoj se kjo do të vazhdojë për të.”
Çuditërisht, vlerësimi i Tarkowskit mbështetet edhe nga statistikat, pasi ai po paraqitet më mirë se ylli i Unitedit, Martinez, i cili me shumë gjasë do të largohet nga klubi verën e ardhshme nëse nuk i ofrohet një kontratë e re.
Branthwaite ka regjistruar mesatarisht më shumë kontribute defensive se argjentinasi këtë sezon, sipas “FotMob”, ndërsa ka bërë më shumë ndërhyrje, më shumë interceptime dhe ka fituar më shumë duele ajrore për ndeshje.
Qartazi, numri 4 i Evertonit do të ishte një përmirësim i madh në raport me Martinezin, por problemi më i madh është nëse Unitedi mund ta përballojë çmimin e kërkuar.
