Kryeministri i Serbisë, Millosh Vuçeviq, në kuadër të Kuvendit të Parë Gjithserb, është takuar dhe ka biseduar me serbët nga Kosova për gjendjen e tyre në Kosovë. Për këtë takim ai ka postuar në instagram duke publikuar edhe fotografi nga takimi.
“Një bisedë e mirë vëllazërore me përfaqësuesit e serbëve nga Kosova dhe Metohia”, ka thënë Vuçeviq në Instagram ku ka postuar edhe disa foto nga takimi.
Siç njofton Lista Serbe, në takim është diskutuar për pozitën e popullit serb në Kosovë dhe hapat e nevojshëm për t’i ndihmuar edhe më tej serbët, në mënyrë që ata të mbijetojnë dhe të qëndrojnë në atë zonë, përkundër terrorit të regjimit në Prishtinë.
“Kryeministri Vuçeviq theksoi qartë se “Kosova dhe Metohia” janë pjesë integrale e Serbisë dhe se do të bëjë gjithçka për të ndihmuar mbijetesën e popullit serb me mbështetjen e presidentit të Serbisë, Aleksandar Vuçiq”, thuhet në postimin e Listës Serbe.
Në takim ishin të pranishëm drejtori i Zyrës për Kosovë dhe Metohi, Petar Petkoviq dhe kryetari i Listës Serbe, dr. Zlatan Elek, si dhe anëtarët Dalibor Jevtiq, Igor Simiq, Danijela Vujiçiq, Dragisha Miloviq, Slavko Simiq dhe të tjerët.
Para takimit me serbët nga Kosova, Vuçeviq ka biseduar edhe me kryetarin e Parlamentit të Malit të Zi Andrija Mandiq.
